શિક્ષણ પાછળનો ખર્ચ દર વર્ષે વધી રહ્યો છે. એક અનુમાન મુજબ તેમાં વાર્ષિક 15 ટકાના દરે વધારો થઈ રહ્યો છે. જો કોઈ વ્યક્તિ પોતાના બાળકોને વિદેશમાં ભણાવવા માંગે છે તો તેનો ખર્ચ અનેક ગણો વધી જાય છે. સરકારી અને ખાનગી બેંકો અને નૉન બેંકિંગ નાણાકીય કંપનીઓ વિદેશી શિક્ષણ માટે એજ્યુકેશન લોન આપે છે. એજ્યુકેશન લોનના કારણે ઘણા વિદ્યાર્થીઓનું વિદેશમાં અભ્યાસ કરવાનું સ્વપ્ન સાકાર થાય છે.
પરંતુ, એવું નથી કે દરેકને વિદેશમાં ભણવા માટે એજ્યુકેશન લોન મળે. લોન આપતા પહેલા, બેંકો સંપૂર્ણ તપાસ કરે છે અને વિદેશી શિક્ષણ માટે લોન ફક્ત તે ઉમેદવારને આપે છે જે તેમની શરતો અને નિયમોનું પાલન કરે છે. જો તમારો ઈરાદો એજ્યુકેશન લોન લેવાનો પણ છે, તો લોન માટે અરજી કરતા પહેલા, તમારે એજ્યુકેશન લોનના તમામ પાસાઓ પર પણ ધ્યાન આપવું જોઈએ અને તેના ફાયદા અને ગેરફાયદા પણ જોવા જોઈએ. તે પછી જ તમારે અરજી કરવી જોઈએ. યોગ્ય જાણકારી લીધા વગર લીધેલી લોન પણ તમારા જીવન માટે મુશ્કેલી બની શકે છે.
👉 કયા-કયા ખર્ચનો થાય છે સમાવેશ?
વિદેશમાં અભ્યાસ માટે લોન લેતા પહેલા એ જાણવું ખૂબ જ જરૂરી છે કે આ લોન કયા ખર્ચ માટે આપવામાં આવી રહી છે. મોટાભાગની બેંકો એજ્યુકેશન લોનમાં ટ્યુશન ફી, રહેવાનો ખર્ચ, આરોગ્ય વીમો અને અભ્યાસ સામગ્રી ખર્ચ આવરી લે છે. ઉદાહરણ તરીકે, બેંક ઓફ બરોડા ઉપરોક્ત તમામ ખર્ચને પ્રોજેક્ટ ખર્ચ તરીકે ગણે છે. બેંક ઓફ બરોડાના જનરલ મેનેજર (મોર્ટગેજ અને અન્ય રિટેલ એસેટ) એચટી સોલંકી કહે છે કે આ સિવાય, બેંક એરફેર, લેપટોપ અને સ્ટેશનરી, સ્ટડી ટૂર, પ્રોજેક્ટ વર્ક અને થીસીસ પર થતા ખર્ચને પણ ધ્યાનમાં રાખીને લોન આપે છે.
પરંતુ લોન લેતા પહેલા તમારે એ જાણી લેવું જોઈએ કે એજ્યુકેશન લોનમાં કયા કયા ખર્ચા સામેલ નથી, જેની વ્યવસ્થા તમારે જાતે જ કરવી પડશે. વધારાના કોચિંગ, પર્સનલ ખર્ચ અથવા બાઈક લેવી અને કોર્સ દરમિયાન ઘરેથી આવવા-જવા પર થતા ખર્ચને એજ્યુકેશન લોનમાં સમાવેશ થતો નથી.
👉 વિવિધ બેંકોના વ્યાજ દરો
વિદેશી અભ્યાસ માટે એજ્યુકેશન લોન લેતા પહેલા વ્યાજ દરો તપાસવાની ખાતરી કરો. આ કરવું જરૂરી છે કારણ કે, વ્યાજ દરથી જ તમને ખ્યાલ આવી શકે છે કે તમે આ લોન સમયસર ચૂકવી શકશો કે નહીં. હાલમાં, સરકારી બેંકો સાત વર્ષની મુદત માટે રૂ. 20 લાખની એજ્યુકેશન લોન પર 6.85 થી 8.20 ટકા વ્યાજ વસૂલે છે. ખાનગી બેંકો 8.45 ટકાથી 14.25 ટકા વ્યાજ દરે એજ્યુકેશન લોન આપી રહી છે. SBIનો વ્યાજ દર 7.25 ટકા, કેનેરા બેન્કનો 7.30 ટકા અને બેન્ક ઓફ બરોડાનો 7.45 ટકા છે. ICICI બેંક અને એક્સિસ બેંક જેવી ખાનગી બેંકો 10.50 થી 13.70 ટકા વ્યાજ વસૂલે છે.
👉 લોન મુદત
વિદેશમાં અભ્યાસ માટે લોન લેતા પહેલા, તમારે કેટલા વર્ષોમાં લોન ચૂકવવાની છે તે જાણવું ખૂબ જ જરૂરી છે. લોનની મુદત ખૂબ જ કાળજીપૂર્વક નક્કી કરવી જોઈએ. એજ્યુકેશન લોનની મહત્તમ ચુકવણીની અવધિ 15 વર્ષ છે. તેથી, લોન લેતા પહેલા, તમારે જાણી લેવું જોઈએ કે તમે કેટલા વર્ષોમાં આ લોનની ચુકવણી કરી શકશો.
👉👉 ટેક્સ બેનિફીટનું રાખો ધ્યાન
આવકવેરાની કલમ 80C હેઠળ શિક્ષણ લોન પર ટેક્સ છૂટ મળે છે. પરંતુ, ખાસ વાત એ છે કે આ છૂટ ફક્ત બેંકો પાસેથી લીધેલી એજ્યુકેશન લોન પર જ મળે છે. તેથી, જો કોઈ વ્યક્તિ ફિનટેક કંપની પાસેથી લોન લે છે, તો તે કર મુક્તિ માટે હકદાર નથી.